၅၀၀၀ ကျပ်တန် သတင်းနှင့်အတူ ငွေတန်ဖိုးကျဆင်း၊ ဈေးနှုန်းအချို့ မြင့်တက်

ရန်ကုန် (မဇ္ဈိမ)။ ။ ဗဟိုဘဏ်က ၅၀၀၀ ကျပ်တန် ငွေစက္ကူများ ထုတ်ဝေမည့်သတင်း ကြေညာသဖြင့် ယနေ့နံနက်တွင် မြန်မာငွေတန်ဖိုး သိသာစွာ ကျဆင်းသွားပြီး ကုန်ပစ္စည်းအချို့ ဈေနှုန်းမြင့်တက်သွားသည်။

တကျပ်သားလျှင် ၅ သိန်း ၇ သောင်း ဝန်းကျင်သာရှိသော ရွှေဈေးမှာ ၆ သိန်းစွန်းစွန်းအထိ ဈေးတက်သွားခဲ့သည်ဟု ရန်ကုန် ရွှေဆိုင်များမှ စုံစမ်းသိရှိရသည်။

“ကောက်တော့ ၅ သိန်း ၉ သောင်းခွဲပါ။ အရောင်းကတော့ ၆ သိန်း တထောင်လောက် ရောင်းပါတယ်။ လောလောဆယ် တကျပ်သားနှစ်ကျပ်သား သမားတွေကိုပဲ ရောင်းပေးပါတယ်။ ပိဿာလောက် လာဝယ်ရင် မရောင်းပါဘူး” ဟု အောင်သမာဓိရွှေဆိုင်မှ တာဝန်ရှိသူတဦးက ပြောဆိုသည်။

ရွှေဘုံသာလမ်းရှိ ရွှေ လေပတ်ကား ရောင်းဝယ်မှုများကို ယနေ့ ရပ်တန့်ထားသည်ဟု ရွှေကုန်သည်တဦးက ဆိုသည်။

၅၀၀၀ ကျပ်တန်ငွေစက္ကူ ထွက်ပေါ်လာခြင်းနှင့်အတူ ကုန်ဈေးနှုန်းများ ကြီးမြင့်လာမည်၊ ငွေကြေးဖောင်းပွမှုများ ဖြစ်ပေါ်လာမည်ဟူသည့် စိုးရိမ်စိတ်များကြောင့် စားသောက်ကုန်များ အများအပြား ဝယ်ယူစုဆောင်းခြင်း ပြုလုပ်လာကြသည်ဟု စားသောက်ကုန်စည်များ အဓိကဖြန့်ဖြူးရာ ညောင်ပင်လေးဈေးရှိ ဆိုင်များက ဆိုသည်။

“ဒီနေ့မနက်ပိုင်းမှာ ညောင်ပင်လေးဈေးမှာ လူတွေ တိုးမပေါက်အောင်ကို ဈေးလာဝယ်နေကြတယ်။ လူတွေစိတ်ထဲမှာ ဒီငွေစက္ကူတွေ ထွက်လာရင် ကုန်ဈေးနှုန်းတွေ အရမ်းတက်သွားမယ်ဆိုပြီး ဈေးတွေ အရမ်းဝယ်နေကြတယ်”

ဟု ယနေ့နံနက်ပိုင်းတွင် ညောင်ပင်လေးဈေးသို့ သွားရောက်ခဲ့သူ ပြည်တွင်း ဂျာနယ်သတင်းထောက်တဦးက ပြောသည်။

လတ်တလော အခြေအနေတွင် ၅၀၀၀ ကျပ်တန် ထွက်ပေါ်မှုထက် ဝယ်လိုအား အဆမတန် များပြားလာသဖြင့် ကုန်စည်အချို့ ဈေးနှုန်းမြင့်တက်သွားကြောင်း ညောင်ပင်လေးဈေးရှိ အရောင်းဆိုင်များမှတဆင့် သိရသည်။

“လောလောဆယ်မှာ ဒီဂယက်ကြောင့် ဘာမှတက်သွားတာ မရှိသေးပါဘူး။ ဒါပေမဲ့ လူတွေ ဈေးအရမ်း လာဝယ်နေကြတော့ တချို့ဆိုင်တွေကတော့ ဆီတို့၊ ကြက်သွန်နီတို့ ဈေးတက်ရောင်းတာတွေ ရှိတယ်။ ဒါပေမဲ့ ဒီလို အခြေအနေမျိုးဆိုရင် ဒီဈေးထဲမှာ ထောက်လှန်းရေးတွေက စောင့်ကြည့်နေတတ်တယ်။ အဲဒါကြောင့် ဘယ်သူမှ ကိုယ်ကစပြီး ဈေးမတင်ရဲဘူး” ဟု ညောင်ပင်လေးဈေးရှိ စားသောက်ကုန် လက်ကားဖြန့်ဖြူးသည့် ဆိုင်တဆိုင်က ဆိုသည်။

ထိုကဲ့သို့ လူအများ စိုးရိမ်ထိတ်လန့်ကာ ကုန်စည်များ အများအပြား ဝယ်ယူ စုဆောင်းလာခြင်းကြောင့် ဝယ်လိုအားများသည့်အတွက် ကုန်ဈေးနှုန်း ကြီးမြင့်ခြင်းကိုပါ ထပ်မံ ကြုံတွေ့လာနိုင်သည်ဟု
ရန်ကုန်မြို့မှ စီးပွားရေး ပညာရှင်များနှင့် ဝါရင့် စီးပွားရေးသမားများက သတိပေးသည်။

ရန်ကုန် စီးပွားရေး တက္ကသိုလ် ပါမောက္ခဟောင်း တဦးဖြစ်သူ ဦးမော်သန်းက “ဈေးကွက်ထဲကို ၅၀၀၀ ကျပ်တန်တွေ ရောက်လာမယ်ဆိုတာ အရင်ရှိပြီးသား ငွေတွေနဲ့ လဲပေးမှာလား။ ဒါမှမဟုတ် ထပ်ပြီး ရိုက်ထုတ်မှာလား။ ထပ်ပြီး ရိုက်ထုတ်မယ်ဆိုရင်တော့ ရိုက်ထုတ်တဲ့ ပမာဏအတိုင်း အင်ဖလေးရှင်း (ငွေကြေးဖောင်းပွမှု) ဖြစ်မှာပဲ” ဟု ဆိုသည်။

ဆက်လက်ပြီး ကုန်ဈေးနှုန်းတက်ခြင်းနှင့် ဈေးကွက်အတွင်း ပစ္စည်းပြတ်လပ်ခြင်းကို ခွဲခြားသိမြင်ရန် လိုသည်ဟု ဦးမော်သန်းက ဆက်လက်သတိပေးသည်။

“အင်ဖလေးရှင်း ဖြစ်တယ်ဆိုပေမယ့် ပစ္စည်းတခုက အရမ်းပေါနေရင် ဈေးမတက်ပါဘူး။ လူတွေ အရမ်းဝယ်နေကြရင်သာ ပစ္စည်းတွေပြတ်ပြီး ဈေးတက်တာတွေ ဖြစ်လာနိုင်တာပါ”

ဟု သူက ဆိုသည်။

ရန်ကုန်မြို့ရှိ နာမည်ကြီး ဆန်ဆိုင်တဆိုင်ကမူ ဆန်မှာယူမှုများ သုံးဆခန့် မြင့်တက်သွားသော်လည်း ဈေနှုန်းမြင့်တက်ခြင်း မရှိသေးကြောင်းနှင့် ဈေးနှုန်း မတက်ရခြင်းမှာလည်း ယခုကဲ့သို့ အခြေအနေမျိုးတွင် ဈေးနှုန်း စတင်တက်ရောင်းချသူကို ထောက်လှမ်းရေးက လာရောက်ဖမ်းဆီးလေ့ရှိသဖြင့် ဆန်ကုန်သည်များကြား ဈေးနှုန်း စပြီးမြင့်ရောင်းချရဲသူ မရှိကြောင်း ဆိုသည်။

“ကုန်လက်ကျန်ရှိတဲ့အထိတော့ ဈေးတိုးမရောင်းကျသေးဘူး။ လက်ရှိကုန်ပစ္စည်းတွေ ပြတ်သွားရင်တော့ ဘာဖြစ်လာမယ်ဆိုတာ မခန့်မှန်းနိုင်သေးဘူး။ ဒါပေမဲ့ လတ်တလောမှာတော့ ဘယ်သူမှ ဈေးတိုး မရောင်းရဲသေးဘူး။ ဝယ်တဲ့သူကလည်း ဈေးတိုးပေးပြီး မဝယ်ရဲဘူး”

ဟု ဘုရင့်နောင်ကုန်စည်ဒိုင်မှာ ကုန်သည်တဦးက ဆိုသည်။

စီးပွားရေး ပညာရှင်တဦးဖြစ်သူ မောင်စူးစမ်းကလည်း

“လူတွေ လန့်ရင် ရှင်းမရဘူး။ အဲဒါအရေးကြီးတယ်။ အင်ဖလေးရှင်းဆိုတာက ဘာမှကြောက်စရာမလိုဘူး။ အင်ဖလေးရှင်းကြောင့် ကုန်ဈေးနှုန်းတက်တာက ရှင်းလို့ရတယ်။ လူတွေလန့်ပြီး အရမ်းဝယ်လို့ ပစ္စည်းပြတ်သွားရင် ဘာမှရှင်းမရဘူး”

ဟု ဆိုသည်။

မြန်မာငွေနှင့် အမေရိကန်ဒေါ်လာ လဲလှယ်နှုန်းမှာ တဒေါ်လာလျှင် မြန်မာကျပ်ငွေ ၁၀၆၀ ကျပ် ၁၀၇၀ ကျပ်ဝန်းကျင်သာရှိခဲ့ရာမှ ယနေ့နံနက်ပိုင်းတွင် ၁၁၈၀ ခန့်အထိ ဈေးနှုန်းမြင့်တက်သွားခဲ့ပြီး ညနေပိုင်းတွင် ၁၁၃၀ ဝန်းကျင်ဖြင့် ဈေးပိတ်သွားခဲ့သည်ဟု နိုင်ငံခြားငွေ လဲလှယ်သည့် ဈေးကွက်အတွင်းမှာ စုံစမ်းသိရှိရသည်။

စင်္ကာပူဒေါ်လာနှင့် မြန်မာငွေလဲလှယ်နှုန်းမှာ စင်္ကာပူတဒေါ်လာလျှင် ၇၈၀ ကျပ်ရှိရာမှ ၈၆၀ ကျပ်အထိ မြင့်တက်သွားခဲ့ပြီး စင်္ကာပူ ရန်ကုန် ငွေလွှဲလုပ်ငန်းများ ရပ်ဆိုင်းထားကြောင်း ငွေလွှဲကုမ္ပဏီများမှတဆင့် စုံစမ်းသိရှိရသည်။

ထိုင်းဘတ်ငွေနှင့် မြန်မာကျပ်ငွေ လဲလှယ်နှုန်းမှာ မြန်မာငွေ ကျပ် ၁၀၀ လျှင် ၃ ဘတ် ၁၄ ပြားရှိရာမှ ၃ ဘတ်အောက်သို့ ကျဆင်းသွားပြီး တရုတ်ယွမ်ငွေနှင့် မြန်မာငွေ လဲလှယ်နှုန်းမှာ မြန်မာကျပ်ငွေ ၁၀၀၀ လျှင် တရုတ်ယွမ်ငွေ ၆ ယွမ် ၃၄ ပြားရှိရာမှ ၆ ယွမ်အထိ ကျဆင်းသွားကြောင်း နယ်စပ်ကုန်သည်များသို့ ဆက်သွယ်မေးမြန်းချက်အရ သိရသည်။

မြန်မာနိုင်ငံ၏ ငွေကြေး ဖောင်းပွမှုနှုန်းမှာ တနှစ်လျှင် ၂ ရာခိုင်နှုန်းမှ ၃ ရာခိုင်နှုန်းကြားသာ ရှိသည်ဟု မြန်မာအစိုးရက ထုတ်ပြန်လေ့ ရှိသော်လည်း၊ အာရှဖွံ့ဖြိုးရေးဘဏ် ADB နှင့် အခြား ငွေကြေးဆိုင်ရာ အဖွဲ့အစည်းများ၏ ထုတ်ပြန်ချက်များက တနှစ် ငွေကြေးဖောင်းပွမှုနှုန်း ၃၀ ရာခိုင်နှုန်းဝန်းကျင် ရှိသည်ဟု ဆိုသည်။